Ipuinaren ostean, kontuan hartu umeak

1991n, Fanon, Italian, Umeen hiria izeneko esperientzia sortu zen. Han eta proiektu hau aurrera eramateko erabakia hartu duten beste hiri batzuetan, urtero-urtero umeei hitza ematen dien Kontseilu bat irekitzen da, umeek hiriaren planifi kazioan parte hartu dezaten:

• “Egun batean pilotarekin jolasten nengoen, eta udaltzain batek kendu egin zidan”.
• “Kotxe gehiegi daude eta ez daukagu jolasteko lekurik”…
• “Nik entrenatzaile gabeko futbol zelai bat nahi dut… utzidazue pilotarekin nik nahi bezala jolasten, mesedez”.

Beluchistanen (Pakistan), hezkuntzako funtzionarioek arretaz entzun eta kontuan hartu zuten Scoutek egindako iradokizuna, neskatoek hezkuntza jasotzeko beharrizanari buruzkoa. Ondorioz, 2.500 neskato matrikulatu ziren eskolan, emakumezkoen analfabetismoa %98koa zen leku hartan.

Haurtzaroaren egoerari buruzko UNICEFen 2003ko txostenaren arabera, Europako neska-mutikoen %42k dioenez, etxean euren bizitzei buruzko erabakiren bat hartzen denean, inork ez du eurekin kontsultatzen.

Umeen protesta eta proposamenak entzun eta kontuan hartzen dituen gizarte, eskola eta familia batek perspektiba irabazten du eta giro demokratikoak sortzen ditu. Herritartasuna ez da soilik pertsona helduen kontua. Adin eta egoera guztietako pertsonek izan behar dute aukera hori.

Aztertu zeintzuk diren hurbileko neska-mutikoen bizitzei eragiten dieten eguneroko erabakiak. Batzar batean, jarri erabaki horiek umeen aurrean, modu arin eta sinplean iritzia eman dezaten. Inork ez du ezer galduko. Aldiz, guztiok irabaziko dugu zerbait: batez ere, besteenganako konfiantza.